វៀតណាម ផ្តល់អាហារូបករណ៍៦០កន្លែង សម្រាប់សិស្សកម្ពុជា ដើម្បីសិក្សាកម្រិតសញ្ញាបត្រជាន់ខ្ពស់បច្ចេកទេស រយៈពេល ៤ ឆ្នាំ

មហាវិទ្យាល័យ Thai Nguyen College នៃប្រទេសវៀតណាម ផ្តល់អាហារូបករណ៍ដល់សិស្ស-និស្សិតកម្ពុជាសរុបចំនួន ៦០ កន្លែង ដើម្បីបន្តការសិក្សាកម្រិតសញ្ញាបត្រជាន់ខ្ពស់បច្ចេកទេស រយៈពេល ៤ ឆ្នាំ (រៀនភាសាវៀតណាម ១ ឆ្នាំ និងជំនាញ ៣ ឆ្នាំ) សម្រាប់ឆ្នាំសិក្សា ២០២៦-២០២៧។ នេះបើតាមសេចក្តីជូនដំណឹងនៃក្រសួងការងារ នៅថ្ងៃទី២២សីហា ២០២៦។យោងតាមសេចក្តីជូនដំណឹងនៃក្រសួងការងារ បានឱ្យដឹងថា អាហារូបករណ៍នេះគ្របដណ្តប់លើមុខជំនាញជាច្រើន ដូចជា ទំនាក់ទំនង និងបច្ចេកទេសអេឡិចត្រូនិក អគ្គិសនីឧស្សាហកម្ម អេឡិចត្រូនិកឧស្សាហកម្ម ព័ត៌មានវិទ្យា ព័ត៌មានវិទ្យាអនុវត្ត គ្រប់គ្រងអាជីវកម្ម បច្ចេកទេសម្ហូបអាហារ ប្រៃសណីយ៍ និងទូរគមនាគមន៍ វេជ្ជសាស្ត្រសត្វ វិទ្យាសាស្ត្រដំណាំ ហិរញ្ញវត្ថុអាជីវកម្ម ធនាគារ និងហិរញ្ញវត្ថុ គណនេយ្យ សេវាផ្នែកច្បាប់ ភាសាកូរ៉េ ភាសាអង់គ្លេស ថែរក្សាសម្ផស្ស បច្ចេកវិទ្យាវិស្វកម្មមេកានិក និងបច្ចេកវិទ្យារថយន្ត។