អ៊ីស្រាអែល ចង់ចូលរួមអភិវឌ្ឍវិស័យអប់រំនៅកម្ពុជា តាមរយៈ​ការ​បណ្តុះបណ្តាលជំនាញបច្ចេកវិទ្យា និង​នវានុវត្តន៍

ប្រទេស​អ៊ីស្រាអែល បានបង្ហាញពីបំណង ចង់រួមចំណែក​ជំរុញការ​អភិវឌ្ឍវិស័យ​អប់រំនៅ​កម្ពុជា តាមរយៈការ​​នាំ​យក​ជំនាញ​ឈានមុខគេ​ផ្នែកបច្ចេកវិទ្យា និង​នវានុវត្តន៍​។

ក្នុងជំនួបជាមួយ​រដ្ឋមន្រ្តីក្រសួងអប់រំ កាលពីដើមសប្តាហ៍នេះ លោក Moran Hadad ប្រធាន​សភាពាណិជ្ជកម្ម​អ៊ីស្រាអែល (CICC) លើកឡើងថា កិច្ចសហប្រតិបត្តិការនេះ នឹង​ធ្វើ​ឡើងតាមរយៈកម្មវិធី​ភាពជាដៃគូ​ដែលមាន​រចនាសម្ព័ន្ធ​រវាងស្ថាប័ន​ឧត្តមសិក្សា​អ៊ីស្រាអែល និង​កម្ពុជា ដោយផ្តោត​សំខាន់​លើ​ការ​រៀបចំ​កម្មវិធីបណ្តុះបណ្តាល និង​កិច្ច​សហការ​ជាមួយ​គ្រឹះស្ថាន​ឧត្តមសិក្សា​ដែលមានកិត្យានុភាព ក្នុងគោលដៅ​ពង្រឹងសមត្ថភាព និង​ផ្លាស់ប្តូរ​ជំនាញ​ដល់​យុវជន​កម្ពុជា។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានស្វាគមន៍ចំពោះគំនិតផ្តួចផ្តើមនេះ, ឯកឧត្តមរដ្ឋមន្រ្តីមានប្រសាសន៍ថា ក្រសួងនឹងពិនិត្យមើលលទ្ធភាពនៃកិច្ចសហប្រតិបត្តិការឱ្យបានគ្រប់ជ្រុងជ្រោយ ដើម្បីជំរុញការកសាងហេដ្ឋារចនាសម្ព័ន្ធ និងការរៀបចំការបណ្តុះបណ្តាលតាមបែបផ្លូវការឱ្យកាន់តែប្រសើរឡើង។

ឯកឧត្តមរដ្ឋមន្រ្តីមានប្រសាសន៍ថា នេះគឺជាជំហានដ៏វិជ្ជមានមួយក្នុងការបង្កើនលទ្ធភាពទទួលបានចំណេះដឹង និងការស្រាវជ្រាវថ្មីៗ ដែលនឹងក្លាយជាគ្រឹះដ៏សំខាន់សម្រាប់យុវជនកម្ពុជាក្នុងការត្រៀមខ្លួនសម្រាប់នាពេលអនាគត ក្នុងយុគសម័យឌីជីថលនេះ។

ប្រភព៖ https://education.ams.com.kh/education-update/national/news/israel-wants-to-contribute-to-the-development-of-education-in-cambodia-through-technology-and-innovation-training