លោក សែ មុទ្ធិជាតិ ប្រធានអង្គការ អ៊ី ប៊ី ស៊ី បានទទួលស្វាគមន៍ និងជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្ស ពិសេសក្រុមយុវជន “មនសិការពលរដ្ឋល្អ” មកពីវិទ្យាល័យ ហ៊ុន សែន សេរីភាព សរុបចំនួន ២០នាក់

កម្មវិធីទាំងមូលបានប្រព្រឹត្ដទៅយ៉ាងរលូន ដូចការគ្រោងទុក ពិសេសមានការចូលរួម យ៉ាងសកម្ម និងផុសផុលពីសំណាក់ក្រុមយុវជន ក្នុងការឡើងធ្វើបទបង្ហាញលើ ប្រធានបទដូចជា៖

១.ក្រុមយុវជនថ្នាក់ទី១០ ធ្វើបទបង្ហាញលើប្រធានបទ “សិស្សជាគ្រូ” ក្រោមគោលបំណង ដើម្បីផលិតសៀវភៅដោះស្រាយលំហាត់ និងជួយសម្រួលដល់ សិស្សា នុសិស្ស ក្នុងការត្រៀមខ្លួនឲ្យបានរួចរាល់ ដើម្បីប្រឡងកម្រិតមធ្យមសិក្សាបឋមភូមិ លើមុខវិជ្ជា គណិតវិទ្យា និងគីមីវិជ្ជាជាដើម។

២.ក្រុមយុវជនថ្នាក់ទី១១ បានធ្វើបទបង្ហាញផ្ដោតលើប្រធានបទ “ចំណេះក្នុងដៃ សម័យឌីជីថល” ដើម្បីរួមចំណែកស្វែងរកដំណោះស្រាយ និងជួយសម្រួលដល់ការសិក្សា ជាក្រុម ពិសេសការផលិតមាតិការចែករំលែកចំណេះល្អៗ នៅលើបណ្ដាញសង្គមជាដើម។

លើសពីនេះ បន្ទាប់ពីការធ្វើបទបង្ហាញបានបញ្ចប់ដោយជោគជ័យ គណៈគ្រប់គ្រងនៃអង្គការអ៊ី ប៊ី ស៊ី បានចែករំលែកគន្លឹះមួយចំនួនដើម្បីឱ្យប្រធានបទដែលប្អូនៗឡើងបកស្រាយឱ្យកាន់តែមានអត្ថន័យខ្លឹមសារ ក៍ដូចជាបទពិសោធន៍នានាទៅកាន់ប្អូនៗ យុវជន ជាពិសេសការទទួលបាន ឱកាស ចុះកម្មសិក្សា (Internship) នៅអង្គការអ៊ី ប៊ី ស៊ី ថែមទៀតផង។

សកម្មភាពនេះ ធ្វើឡើងស្របតាមទិសដៅបេសកកម្មអង្គការអ៊ី ប៊ី ស៊ី ក្នុងការរួមចំណែក លើកកម្ពស់គុណភាពអប់រំ និងការទទួលបាននូវសមភាពនៃការអប់រំនៅកម្ពុជា តាមរយៈ ការផ្ដល់សេវាអប់រំតាមបែបឌីជីថលដល់សិស្សានុសិស្ស លោកគ្រូអ្នកគ្រូ និងដៃគូពាក់ព័ន្ធ នានាជាដើម។