ភ្នំពេញនឹងធ្វើជាម្ចាស់ផ្ទះ នៅក្នុងដំណើរការនៃការប្រឡងសិស្សពូកែទូទាំងប្រទេសឆ្នាំ២០២៦-២០២៧

ក្រសួងអប់រំ៖ កម្មវិធីប្រឡងជ្រើសរើសសិស្សពូកែទូទាំងប្រទេសនៅក្នុងឆ្នាំសិក្សា ២០២៦-២០២៧ នឹងប្រព្រឹត្តិទៅចាប់ពីថ្ងៃទី២៦ ដល់ថ្ងៃទី៣០ ខែមេសា ឆ្នាំ២០២៦ នៅក្នុងរាជធានីភ្នំពេញ។ ការប្រឡងនេះនឹងធ្វើលើមុខវិជ្ជា អក្សរសាស្ត្រខ្មែរ គណិតវិទ្យា និងរូបវិទ្យា ដែលក្នុងមួយមុខវិជ្ជាជ្រើសរើសសិស្សជ័យលាភីចំនួន ៥រូប។

យោងតាមសេចក្តីណែនាំរបស់ក្រសួងអប់រំ គ្រប់មន្ទីរអប់រំតាមបណ្តារាជធានីខេត្តទាំងអស់ត្រួវរៀបចំដំណើរការសិស្សពូកែថ្នាក់ទី៩ និងទី១២ទៅតាមមុខវិជ្ជាអក្សរសាស្រ្តខ្មែរ គណិតវិទ្យា និងរូបវិទ្យា ទៅតាមចំនួនស្តង់ដារដែលបានកំណត់ ទៅតាមពេលវេលាសមស្របណាមួយ ដើម្បីជ្រើសរើសសិស្សជ័យលាភីទៅប្រកួតបន្តនៅកម្រិតទូទាំងប្រទេស។ មួយវិញទៀត សម្រាប់ការរៀបចំប្រធានវិញ្ញាសារ គណៈកម្មការរៀបចំការប្រឡង និងការប្រឡងតាមបណ្តាខេត្ត និងរាជធានីគឺជាបន្ទុក និងទំនួលខុសត្រូវរបស់មន្ទីរអប់រំនៅតាមបណ្តារាជធានី ខេត្តនីមួយៗ។ សម្រាប់ដំណើរការនៃការប្រឡងជ្រើសរើស មន្ទីរអប់រំអាចបត់បែនទៅតាមលទ្ធភាពថវិការ គំនិតច្នៃប្រឌិត លំនាំនៃការប្រឡងកន្លងមក និងស្ថានភាពដែលកើតមានជាក់ស្តែង។បន្ថែមពីនេះ មន្ទីរអប់រំនីមួយៗមានតួនាទីទទួលខុសត្រូវលើការបញ្ជូនបេក្ខជនជ័យលាភីទៅប្រឡងថ្នាក់ជាតិ។

បើតាមប្រភពដដែល ចំពោះដំណើរការនៃការប្រឡងទូទាំងប្រទេសដែលមានរាជធានីភ្នំពេញជាម្ចាស់ផ្ទះ មន្ទីអប់រំរាជធានីនឹងត្រូវជ្រើសរើសគ្រឹះស្ថានសមស្របណាមួយសម្រាប់ធ្វើជាមណ្ឌលប្រឡង។ មួយវិញទៀតរាជធានីជាម្ចាស់ផ្ទះ ត្រូវទទួលបន្ទុករៀបចំកម្មវិធី ពិធីការផ្សេងៗដែលមានដូចជា បើក និងបិទការប្រឡង ការអញ្ជើញគណៈធិបតី និងភាគីពាក់ព័ន្ធចូលរួម ចែកវិញ្ញាបនបត្រ ព្រមទាំងរៀបចំរង្វាន់ជ័យលាភីឱ្យបានមុនបើកសម័យប្រឡងជ្រើសរើសសិស្សពូកែ។ ក្នងនោះចំពោះរង្វាន់ជ័យលាភីនឹងប្រគល់ឱ្យសម្រាប់បេក្ខជនទទួលបានជ័យលាភីលេខ១ ដល់លេខ៥ទៅតាមមុខវិជ្ជានីមួយៗ ហើយចំពោះជ័យលាភីពីលេខ១ ដល់លេខបីនឹងទទួលបានមេដៃ មាស ប្រាក់ និងសំរឹទ្ធ និងថវិកាផងដែរ។

គួរបញ្ជាក់ផងដែរថា ចំពោះការរៀបចំការប្រឡងសិស្សពូកែដែលរៀបចំជារៀងរាល់ឆ្នាំនេះគឺជាពង្រឹងគុណភាពអប់រំ និងអភិវឌ្ឍន៍ធនធានមនុស្សប្រកបដោយសីលធម៌ និងចំណេះដឹង។

ប្រភព៖ https://kh.cc-times.com/posts/27013