ក្រសួងអប់រំ រៀបចំសន្និបាត រយៈពេល០៣ថ្ងៃ ក្រោមប្រធានបទ “គន្លងអប់រំថ្មី ដើម្បីអភិវឌ្ឍមូលធនមនុស្សប្រកបដោយបរិយាបន្ន និងភាពធន់”

ក្រសួងអប់រំ៖ ក្រសួងអប់រំ នាថ្ងៃទី១១ ខែកុម្ភៈនេះ បានបើកសន្និបាទបូកសរុបការងារឆ្នាំសិក្សា២០២៤-២០២៥ និងពិភាក្សាអំពីផែនការក្នុងឆ្នាំសិក្សា ២០២៥ ២០២៦ ក្រោមប្រធានបទ “គន្លងអប់រំថ្មី ដើម្បីអភិវឌ្ឍមូលធនមនុស្សប្រកបដោយបរិយាបន្ន និងភាពធន់” នៅឯវិទ្យាស្ថានបច្ចេកវិទ្យាកម្ពុជា។ គោលបំណងនៃសន្និបាតនេះ គឺដើម្បីបូកសរុបលទ្ធផលកំណែទម្រង់ និងរំលេចសមិទ្ធផលការងារដែលបានចាប់ផ្តើមធ្វើចាប់តាំងពីឆ្នាំ ២០១៣មក។

យោងតាមសេចក្តីប្រកាសរបស់ក្រសួងអប់រំ សន្និបាតនេះនឹងធ្វើឡើងរយៈពេលបីថ្ងៃពោលគឺចាប់ពីថ្ងៃទី១១ ដល់ថ្ងៃទី១៣ ខែកុម្ភៈ ឆ្នាំ២០២៦។ក្នុងនោះសន្និបាតទាំងមូលនឹងក្តោបទៅលើ សង្ខេបអំពីលទ្ធផលការងារក្នុងឆ្នាំសិក្សា២០២៤-២០២៥។ បង្ហាញពីផលប៉ះពាល់របស់វិវាទរវាងកម្ពុជា ថៃទៅលើការអប់រំ។ ក្នុងនោះដែរ វេទិការទី១ នឹងផ្តោតលើការអភិវឌ្ឍមូលធនមនុស្សប្រកបដោយបរិយាបន្ន និងភាពធន់ ដែលស្តីពីកំណែទម្រង់នៃការអប់រំឆ្ពោះទៅកាន់គន្លងនៃការអប់រំថ្មីដែលផ្តោតលើគ្រូបង្រៀន លទ្ធផលសិក្សារបស់សិស្ស និងដាក់សាកល្បងគន្លងអប់រំថ្មី។

វេទិកាទី២ អភិវឌ្ឍឧត្តមសិក្សាដើម្បីពិពិធកម្មនិងកំណើនសេដ្ឋកិច្ច ផ្តោតលើការស្រាវជ្រាវនិងនវានុវត្តន៍និងបរិវត្តកម្មបច្ចេកវិទ្យាបញ្ញាសិប្បនិម្មិតនៅឧត្តមសិក្សា ការកាត់បន្ថយគម្លាតជំនាញតាមរយៈទំនើបកម្មកម្មវិធីសិក្សានិងវិធីសាស្ត្របង្រៀន ការអភិវឌ្ឍកម្មវិធីសិក្សាថ្នាក់អន្តរជាតិដើម្បីលើកកម្ពស់ស្តង់ដាគុណភាពនិងលទ្ធផលសិក្សារបស់និស្សិត ការពង្រឹងអភិបាលកិច្ចដើម្បីអភិវឌ្ឍប្រកបដោយចីរភាពនៅគ្រឹះស្ថានឧត្តមសិក្សា។

វេទិកាទី៣ អភិវឌ្ឍយុវជនដើម្បីជាតិនិងប្រជាជន ស្តីពីការអប់រំក្រៅប្រព័ន្ធនិងបរិយាបន្នរួមចំណែកអភិវឌ្ឍជាតិប្រកបដោយសមធម៌និងចីរភាព ការផ្តល់ឱកាសដល់យុវជនមានពិការភាពឱ្យមានសមត្ថភាពចូលរួមអភិវឌ្ឍជាតិ។ វេទិកាទី៤៖ អភិវឌ្ឍការអប់រំកាយនិងកីឡាដើម្បីសុខុមាលភាពនិងកិត្យានុភាពជាតិ ស្តីពីការលើកកម្ពស់សកម្មភាពអប់រំកាយនិងកីឡាដើម្បីរួមចំណែកបង្កើនគុណភាពអប់រំនិងសុខភាពសាធារណៈ ការលើកកម្ពស់ការហាត់ហ្វឹកហ្វឺនកីឡាករជម្រើសជាតិនិងថ្នាលដើម្បីឧត្តមភាពគុណផលកីឡានិងកិត្យានុភាពជាតិ ការពង្រឹងវប្បធម៌កីឡាស្អាតស្អំនៅកម្ពុជា ការលើកកម្ពស់សុខភាពសិក្សានៅតាមសាលារៀន។ សន្និបាតទាំងមូល នឹងបិទបញ្ចប់ដោយសំណួរចម្លើយ រួមទាំងការបូកសរុបលទ្ធផល និងដំណោះស្រាយសម្រាប់ឆ្នាំសិក្សាបន្ទាប់ដោយលោកហង់ ជួនណារ៉ុន រដ្ឋមន្ត្រីក្រសួងអប់រំ។

គួរបញ្ជាក់ផងដែរថា ក្នុងឱកាសសន្និបាតនេះក៏មានការប្រគល់ពានរង្វាន់សម្តេចហ៊ុនសែនជូន នាយកល្អ គ្រូបង្រៀនល្អ សាលារៀនស្អាត និងពានរង្វាន់សាលារៀនគំរូផងដែរ។ ព្រឹត្តិការណ៍ ត្រូវបានផ្សាយបន្តផ្ទាល់លើបណ្ដាញសង្គមផ្លូវការរបស់ក្រសួងអប់រំ យុវជន និងកីឡា៕
ប្រភព៖ https://kh.cc-times.com/posts/27101