កម្ពុជាសិក្សាបទពិសោធពីអាល្លឺម៉ង់លើការអនុវត្តកម្មវិធីបណ្តុះបណ្តាលនៅកន្លែងការងារ (WBL)

ក្រសួងការងារ និង​បណ្តុះបណ្តាលវិជ្ជាជីវៈកម្ពុជា កំពុងសិក្សា​ពីបទពិសោធរបស់ប្រទេសអាល្លឺម៉ង់ លើការងារបណ្តុះបណ្តាល​បច្ចេកទេស​វិជ្ជាជីវៈ ពិសេសការអនុវត្តកម្មវិធីបណ្តុះបណ្តាល​នៅ​កន្លែង​ការងារជាក់ស្តែង (WBL) ដែលជា​ប្រព័ន្ធ​បណ្តុះបណ្តាល​មួយតម្រូវ​ឱ្យ​សិស្ស​សិក្សា​ទ្រឹស្តីនៅសាលា និង​អនុវត្ត​ការងារ​ជាក់ស្តែង​នៅ​កន្លែង​ការងារ។

ប្រទេស​អាល្លឺម៉ង់ តាមរយៈទីភ្នាក់ងារ​សហប្រតិបត្តិការ​អាល្លឺម៉ង់ (GIZ) បាន​កំពុង​អនុវត្ត​គម្រោងជា​ច្រើន​នៅ​ប្រទេស​កម្ពុជា ក្រោមការឧបត្ថម្ភពីក្រសួងសហប្រតិបត្តិការសេដ្ឋកិច្ច និងអភិវឌ្ឍន៍អាល្លឺម៉ង់ (BMZ) ទាក់ទងនឹងការអភិវឌ្ឍជំនាញតាមរយៈកម្មវិធីបណ្តុះបណ្តាលបច្ចេកទេសវិជ្ជាជីវៈ និងការអនុវត្តកម្មវិធីបណ្តុះបណ្តាលនៅកន្លែងការងារជាក់ស្តែង (WBL)។

ក្នុងដំណើរទស្សនកិច្ច​ទៅកាន់ទីស្នាក់ការ​កណ្តាល​ទីភ្នាក់ងារ​សហប្រតិបត្តិការ​អាល្លឺម៉ង់ (GIZ) នាទីក្រុង​ហ្រ្វេងហ្វឺត ប្រទេស​អាល្លឺម៉ង់ កាលពីចុងសប្តាហ៍កន្លងទៅនេះ ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ បានជួបពិភាក្សាការងារជាមួយលោក ថស៍ស្ទីន ហ្សាវហ្វឺ ហ្គាមបល (Thorsten Schafer Gumbel) ប្រធានក្រុមប្រឹក្សាភិបាលនៃទីភ្នាក់ងារសហប្រតិបត្តិការអាល្លឺម៉ង់ (GIZ) ដោយ​បាន​ឯកភាពគ្នាក្នុងការបន្តពង្រឹងកិច្ចសហប្រតិបត្តិការលើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ជាពិសេសលើការលើកកម្ពស់ការអភិវឌ្ឍជំនាញ ដែលជាកត្តាចាំបាច់​សម្រាប់កម្ពុជាក្នុងការបន្តរក្សា​បាននូវភាពប្រកួតប្រជែង​នៅពេលកម្ពុជាបានចាកចេញពីប្រទេសអភិវឌ្ឍតិចតួច (LDC)។

លោក ថស៍ស្ទីន ហ្សាវហ្វឺ ហ្គាមបល ប្រធានក្រុមប្រឹក្សាភិបាល GIZ បានកត់សម្គាល់ថា ការធ្វើទំនើបកម្មកម្លាំងពលកម្មគឺជាកាតាលីករចម្បងសម្រាប់ការផ្លាស់ប្តូររបស់ប្រទេសកម្ពុជាពីឋានៈប្រទេសអភិវឌ្ឍន៍តិចតួច (LDC)។ លោកមានប្រសាសន៍បន្ថែមថា ការលើកកម្ពស់ជំនាញនៅតែជាអាទិភាពដ៏សំខាន់សម្រាប់ការប្រកួតប្រជែងផ្នែកសេដ្ឋកិច្ច។

ជាមួយ​គ្នានេះ គណៈប្រតិភូកម្ពុជា និង GIZ ក៏​បានពិនិត្យឡើងវិញនូវគម្រោងដែលសម្របស្តង់ដារបណ្តុះបណ្តាលអឺរ៉ុបទៅនឹងតម្រូវការឧស្សាហកម្មក្នុងស្រុក ក្នុងនោះ​ក៏​មាន ការអនុវត្តកម្មវិធីបណ្តុះបណ្តាល​នៅ​កន្លែង​ការងារជាក់ស្តែង ដែល​សិស្ស​និស្សិតត្រូវ​បែងចែកពេលវេលារបស់ពួកគេរវាងសាលា និងកន្លែងធ្វើការដៃគូ ដើម្បីតម្រឹមជំនាញជាមួយនឹងតម្រូវការរបស់និយោជក៕

ប្រភព៖​ https://education.ams.com.kh/education-update/national/news/cambodia-studies-experience-from-germany-on-the-implementation-of-the-workplace-training-program-wbl