PSE ជ្រើសរើសសិស្សមកពីគ្រួសារក្រីក្រ រៀនក្នុងកម្មវិធីបណ្តុះបណ្តាលជំនាញវិជ្ជាជីវៈ

យោងតាមសេចក្តីជូនដំណឹងនៅលើគេហទំព័រ វិទ្យាស្ថាន ប៉េ អេស អឺ បានឱ្យដឹងថាអាហារូបករណ៍នេះផ្តល់ឱ្យពិសេសសម្រាប់សិស្សមកពីគ្រួសារក្រីក្រ ហើយនៅក្នុងអំឡុងពេលសិក្សាវិទ្យាស្ថានក៏មានផ្តល់ឱ្យនូវអាហារបីពេល ហើយសិស្សស្រីនឹងមានអាទិភាពទទួលបានកន្លែងស្នាក់នៅ។ ។ក្នុងនោះថ្នាក់ចំណេះដឹងទូទៅតាមសាលារដ្ឋគឺ បើកទទួលពាក្យសម្រាប់សិស្សានុសិស្សទូទៅចាប់ពីថ្នាក់ទី១ ដល់ទី១២ដែលមានទីលំនៅនៅទីក្រុងភ្នំពេញ និងខេត្តសៀមរាប។ ចំពោះថ្នាក់ពន្លឿននៅក្នុងមណ្ឌល សិស្សត្រូវមានអាយុយ៉ាងតិច ១១ឆ្នាំ និងសិក្សាយឺតជាងកម្មវិធីសិក្សាយ៉ាងតិច ២ឆ្នាំ និងជាសិស្សនៅក្នុងរាជធានីភ្នំពេញ ។ រីឯថ្នាក់បណ្តុះបណ្តាលជំនាញវិជ្ជាជីវៈ បើកទទួលពាក្យសម្រាប់បេក្ខជនមកពី ២៥ខេត្តក្រុង មានអាយុចាប់ពី ១៥ឆ្នាំឡើងទៅ និងមានកម្រិតវប្បធម៌ទាបបំផុតត្រឹមថ្នាក់ទី៧។គួរបញ្ជាក់ផងដែរថា សម្រាប់ការសិក្សាសិស្សតម្រូវឱ្យចូលរៀនចាប់ពីម៉ោង ៦:៣០ ដល់ម៉ោង ៥ល្ងាច និងត្រូវគោរពនូវគោលការរបស់អង្គការដើម្បីភាពញញឹមនៃកុមារ និងដាច់ខាតមិនអនុញ្ញាតឱ្យយកអាហារ និងភេសជ្ជៈផ្សេងៗចូលក្នុងសាលាទេ។ បេក្ខជនអាចដាក់ពាក្យដោយផ្ទាល់នៅ ការិយាល័យសង្គមនៃអង្គការដើម្បីភាពញញឹមនៃកុមារដែលមានអាសយដ្ឋាននៅភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ៕