ទីស្តីការគណៈរដ្ឋមន្ត្រី នឹងរៀបចំការប្រកួតតែងកំណាព្យក្រោមប្រធានបទខ្មែរក្រហម

ភ្នំពេញ៖ ទីស្តីការគណៈរដ្ឋមន្រ្តី មជ្ឈមណ្ឌលតម្កល់ឯកសារច្បាប់ ពាក់ពន្ធនឹងអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) នឹងរៀបចំការប្រកួតតែងកំណាព្យសម្រាប់ សិស្ស និស្សិត និងគរុសិស្ស។កម្មវិធីប្រកួតតែងកំណាព្យនេះធ្វើឡើងក្នុងគោលបំណងចូលរួមលើកស្ទួយវិស័យអក្សរសាស្រ្តខ្មែរផ្នែកតែងនិពន្ធកំណាព្យ ព្រមទាំងជំរុញ និងលើកទឹកចិត្តដល់យុវជនជំនាន់ក្រោយដែលមិនបានឆ្លងកាត់នូវរបបកម្ពុជាប្រជាធិបតេយ្យបានសិក្សាស្វែងយល់ឲ្យកាន់តែស៊ីជម្រៅអំពីប្រវត្តិសាស្ត្រខ្មែរក្រហម ផលប៉ះពាល់ ដំណើរការកាត់ទោសមេដឹកនាំខ្មែរក្រហម ក៏ដូចជាសមិទ្ធផលនិងកេរដំណែលរបស់អ.វ.ត.ក. ។

យោងតាមការប្រកាសរបស់អង្គជំនុំជម្រះវិសាមញ្ញក្នុងតុលាការម្ពុជា ការប្រកួតតែងកំណាព្យនេះបើកឱកាសសម្រាប់បេក្ខជនជាសិស្ស និស្សិត គរុសិស្សដែលកំពុងសិក្សានៅតាមបណ្តាគ្រឹះស្ថានសិក្សានៅទូទាំងប្រទេសទាំងរដ្ឋ និងឯកជន។ មួយវិញទៀត បេក្ខជននឹងតែងកំណាព្យក្នុងប្រធានបទដែលទាក់ទងនឹងសម័យខ្មែរក្រហម។ បេក្ខជនអាចតែងកំណាព្យបានក្រោមប្រធានបទ បរិបទប្រវត្តិសាស្ត្រនៃរបបកម្ពុជាប្រជាធិបតេយ្យ ឬសម័យខ្មែរក្រហម។ ផលប៉ះពាល់នៃរបបកម្ពុជាប្រជាធិបតេយ្យ (ភាពឈឺចាប់ ការបាត់បង់ ការភ័យខ្លាច និងភាពសោកសៅជាដើម)។ ប្រវត្តិ ឬរឿងរ៉ាវរបស់គ្រួសារក្នុងសម័យខ្មែរក្រហម។ ការបង្កើតសាលាក្តីខ្មែរក្រហម និងការកាត់ទោសមេដឹកនាំខ្មែរក្រហម។ សមិទ្ធផល និងកេរដំណែលនៃសាលាក្តីខ្មែរក្រហម ការការពារ និងការទប់ស្កាត់ការវិលមកវិញនៃរបបខ្មែរក្រហម។

បើតាមប្រភពដដែល កម្មវិធីប្រកួតប្រជែងនេះនឹងជ្រើសរកបេក្ខជនជ័យលាភីចំនួន ៥រូប។ បេក្ខជននឹងទទួលបានប្រាក់រង្វាន់ដែលរួមមានលេខ១ ទទួលបាន ២លានរៀល, លេខ២ ទទួលបាន ១លាន ៥សែនរៀល, លេខ៣ ទទួលបាន ១លានរៀន, លេខ៤ និងលេខ៥ ទទួលបាន ៥សែនរៀល។ បន្ថែមពីនេះ ស្នាដៃរបស់បេក្ខជនជ័យលាភីនឹងត្រូវបានយកទៅបោះពុម្ភផ្សាយ។

គួរបញ្ជាក់ថា បេក្ខជនអាចដាក់ប្រកួតកំណាព្យរបស់ខ្លួនជាPDF ឬ Word រួមជាមួយពាក្យសុំចូលរួមប្រកួតទៅកាន់ Email ៖ sopheakldc@gmail.com ឱ្យបានមុនថ្ងៃទី១៥ ខែមិថុនា ឆ្នាំ២០២៦ ។ សម្រាប់ព័ត៌មានបន្ថែមសូមទាក់ទងទៅកាន់ទូរស័ព្ទលេខ ០៩៦ ៩១៥២ ១២៤៕