របាយការណ៍សកម្មភាពអង្គការ អ៉ីប៊ីស៊ី

ការចូលរួមក្នុងព្រឹត្តិការណ៍ថ្នាក់ជាតិ

អង្គការ អ៉ីប៊ីស៊ី បានចូលរួមក្នុងកម្មវិធីពិព័រណ៍មហោស្រពវិទ្យាសាស្រ្តកម្ពុជាប្រចាំឆ្នាំ២០២៦ ដែលរៀបចំដោយ STEM Education Organization for Cambodia ដើម្បីលើកកម្ពស់ការសិក្សាផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។ ក្នុងឱកាសនោះ អ៊ីប៊ីស៊ី ក៏បានដាក់តាំងបង្ហាញមាតិកាអប់រំល្អៗ រួមមានថ្នាលសិក្សាឌីជីថល និងបច្ចេកវិទ្យា AR-VR ដែលទទួលបានការចាប់អារម្មណ៍យ៉ាងខ្លាំង។ តាមរយៈកម្មវិធីនេះ សិស្សានុសិស្សជាង ៥០០ នាក់ មានឱកាសស្វែងយល់បន្ថែមពីថ្នាលអប់រំអ៊ីប៊ីស៊ី ជាថ្នាលផ្ដល់ការសិក្សាឥតគិតថ្លៃ និងគាំទ្រការសិក្សារយះពេលយូរ។​

ការពង្រីកកិច្ចសហប្រតិបត្តិការជាមួយដៃគូអភិវឌ្ឍន៍ និងវិស័យឯកជន

រាជបណ្ឌិត្យសភាកម្ពុជា (RAC)៖ កាលពីថ្ងៃទី ១៧ ខែកុម្ភៈ ឆ្នាំ ២០២៦ លោក ជីម សុក្រានុភាព អ្នកគ្រប់គ្រងប្រតិបត្តិការជាន់ខ្ពស់ បានទទួលស្វាគមន៍ និងពិភាក្សាការងារជាមួយ លោកស្រី កែវ ខេមរា ប្រធាននាយកដ្ឋានបោះពុម្ពផ្សាយ និងបណ្ណាល័យ នៃអគ្គលេខាធិការដ្ឋានរាជបណ្ឌិត្យសភាកម្ពុជា (RAC) ក្នុងគោលបំណងពិភាក្សាលើការរៀបចំកម្មវិធីទស្សនកិច្ចសិក្សានៅអង្គការ អ៊ីប៊ីស៊ី និងកិច្ចសហការអភិវឌ្ឍប្រព័ន្ធបណ្ណាល័យអេឡិចត្រូនិច (eLibrary) រួមគ្នា។

អង្គការដើម្បីស្នាមញញឹមនៃកុមារ (PSE)៖ កាលពីថ្ងៃទី ០២ ខែកុម្ភៈ ឆ្នាំ ២០២៦ លោក សែ មុទ្ធិជាតិ បានទទួលស្វាគមន៍គ្រូ និងសិស្សពី PSE មកទស្សនកិច្ចបន្ទប់ XR ស្ទូឌីយោ និងបន្ទប់ផលិតករ ដែលនាំឱ្យសិស្សមានចំណាប់អារម្មណ៍ចង់ហាត់ការជាមួយអង្គការ ។

ទីភ្នាក់ងារ JICA (ជប៉ុន)៖ នាព្រឹកថ្ងៃទី ១៦ ខែកុម្ភៈ ឆ្នាំ ២០២៦ លោក សែ មុទ្ធិជាតិ ប្រធានអង្គការអ៊ីប៊ីស៊ី (EBC) បានទទួលស្វាគមន៍ និងដឹកនាំកិច្ចប្រជុំពិភាក្សាការងារជាមួយ លោក Koji Takahashi អនុប្រធានគម្រោង JICA/S-TEC និងក្រុមការងារនៃទីភ្នាក់ងារ JICA ប្រចាំកម្ពុជា ក្នុងគោលបំណងពិភាក្សាលើផែនការផលិតវីដេអូមេរៀនសម្រាប់កម្មវិធីបណ្តុះបណ្តាលគ្រូ (១២+៤) ការគ្រប់គ្រងដំណើរការថ្នាលសិក្សាតាមអនឡាញ (LMS) និងការត្រៀមពង្រឹងកិច្ចសហប្រតិបត្តិការលើការប្រើប្រាស់បច្ចេកវិទ្យាឌីជីថល ដើម្បីលើកកម្ពស់វិស័យអប់រំនៅកម្ពុជា ស្របតាមការប្តេជ្ញាចិត្តរបស់អង្គការ EBC ក្នុងការបន្តពង្រីកវិសាលភាពប្រព័ន្ធអប់រំឌីជីថលឱ្យកាន់តែប្រសើរ និងទូលំទូលាយទូទាំងប្រទេស។

ក្រុមហ៊ុន Huawei៖ នារសៀលថ្ងៃទី ២៨ ខែមករា ឆ្នាំ ២០២៦ លោក សែ មុទ្ធិជាតិ ប្រធានអង្គការ អ៊ីប៊ីស៊ី (EBC) បានទទួលស្វាគមន៍ និងដឹកនាំកិច្ចពិភាក្សាការងារជាមួយប្រតិភូក្រុមហ៊ុន Huawei ដែលរួមមាន លោក Derek Yang នាយកផ្នែក Government Business លោក Ding Bin នាយកផ្នែក Network Solution និងកញ្ញា Lao Kuyhouy វិស្វករផ្នែក Network Solution ក្នុងគោលបំណងផ្លាស់ប្តូរយោបល់ និងស្វែងយល់អំពីវឌ្ឍនភាពនៃហេដ្ឋារចនាសម្ព័ន្ធរបស់អង្គការ EBC ព្រមទាំងពិនិត្យលទ្ធភាពក្នុងការពង្រឹងកិច្ចសហប្រតិបត្តិការនាពេលអនាគត ដើម្បីជួយគាំទ្រដល់ការអភិវឌ្ឍហេដ្ឋារចនាសម្ព័ន្ធឌីជីថលនៅតាមបណ្តាសាលាដៃគូសហការឱ្យកាន់តែប្រសើរឡើង។

ក្រុមហ៊ុន អប្សរា មេឌាសឺវីស (AMS)៖ នារសៀលថ្ងៃទី១៣ ខែកុម្ភៈ ឆ្នាំ២០២៦ លោក ជីម សុក្រានុភាព អ្នកគ្រប់គ្រងប្រតិបត្តិការជាន់ខ្ពស់ បានដឹកនាំក្រុមការងារអង្គការ អ៊ីប៊ីស៊ី (EBC) ទៅបំពេញទស្សនកិច្ចនៅក្រុមហ៊ុន អប្សរា មេឌាសឺវីស (AMS) ដើម្បីស្វែងយល់ពីដំណើរការការងារ បច្ចេកទេសស្ទូឌីយោ និងការិយាល័យផលិតមាតិកា ក្រោមការទទួលស្វាគមន៍យ៉ាងកក់ក្តៅពីសំណាក់ថ្នាក់ដឹកនាំ និងក្រុមការងារ AMS។ ដំណើរទស្សនកិច្ចនេះ គឺជាជំហានដ៏សំខាន់ក្នុងការផ្លាស់ប្តូរបទពិសោធន៍បច្ចេកទេស និងពង្រឹងទំនាក់ទំនងដើម្បីឈានទៅរកកិច្ចសហការផលិតកម្មវិធីថ្មីៗរួមគ្នា ក្នុងគោលបំណងពង្រីកវិសាលភាពនៃធនធានសិក្សាឌីជីថលឱ្យកាន់តែសម្បូរបែប និងប្រកបដោយគុណភាព សម្រាប់បម្រើដល់ការសិក្សាស្រាវជ្រាវរបស់សិស្សានុសិស្ស គ្រូបង្រៀន និងអ្នកសិក្សាទូទាំងប្រទេស។

ការប្រើប្រាស់ប្រព័ន្ធគ្រប់គ្រងការសិក្សា (LMS) និងមជ្ឈមណ្ឌលជំនួយ

ការបណ្តុះបណ្តាលគ្រូ

ដើម្បីធានានិរន្តរភាពនៃវិស័យអប់រំបែបឌីជីថល អង្គការ អ៊ីប៊ីស៊ី (EBC) បានបន្តរៀបចំវគ្គបណ្តុះបណ្តាលស្តីពីការប្រើប្រាស់ប្រព័ន្ធគ្រប់គ្រងការសិក្សា (LMS) ជូនដល់លោកគ្រូ អ្នកគ្រូ នៅតាមសាលាដៃគូយ៉ាងយកចិត្តទុកដាក់ ដោយក្នុងនោះរួមមានសាលារៀនជំនាន់ថ្មី (NGS) ទាំង ១៣ សាលា និងសហគមន៍មជ្ឈមណ្ឌលបច្ចេកវិទ្យាទាំង ១៨ ទីតាំង ក្នុងខេត្តតាកែវ ដើម្បីពង្រឹងសមត្ថភាពបង្រៀន និងរៀនឱ្យកាន់តែមានប្រសិទ្ធភាពខ្ពស់។

យន្តការគាំទ្រ និងមជ្ឈមណ្ឌលជំនួយបច្ចេកទេស

ក្រុមការងារបច្ចេកទេសរបស់អង្គការ អ៊ីប៊ីស៊ី តែងតែបន្តខិតខំប្រឹងក្នុងការសម្របសម្រួល និងជំរុញការប្រើប្រាស់ប្រព័ន្ធគ្រប់គ្រងការសិក្សា (Learning Management System – LMS) នៅតាមគ្រឹះស្ថានសិក្សាដៃគូ រួមមាន៖

• ការធានាឱ្យប្រព័ន្ធដំណើរការបានរលូន ២៤ ម៉ោងលើ ២៤ ម៉ោង។
• ការតាមដាន និងដោះស្រាយបញ្ហាបច្ចេកទេសដែលកើតឡើងជាយថាហេតុ។
• ការផ្ដល់ការណែនាំអំពីរបៀបប្រើប្រាស់មុខងារថ្មីៗដល់អ្នកគ្រប់គ្រងប្រព័ន្ធនៅតាមសាលារៀន។

ឆ្លើយតបទៅនឹងតម្រូវការជាក់ស្ដែង និងដើម្បីផ្ដល់សេវាកម្មឱ្យបានរហ័សទាន់ចិត្ត ក្រុមការងារបានបង្កើត ឆាណែលតេឡេក្រាមផ្លូវការសម្រាប់ផ្ដល់ជំនួយបច្ចេកទេសផ្ទាល់ដល់ លោកគ្រូ អ្នកគ្រូ សិស្សានុសិស្ស និងអ្នកគ្រប់គ្រងប្រព័ន្ធ (School Manager) នៅតាមបណ្ដាសាលារៀន។ នៅពេលអ្នកប្រើប្រាស់ជួបបញ្ហាបច្ចេកទេសណាមួយ ពួកគាត់អាចរាយការណ៍ភ្លាមៗ ហើយក្រុមការងារជំនាញនឹងឆ្លើយតប ក៏ដូចជាដាក់ចេញនូវដំណោះស្រាយបានទាន់ពេលវេលាបំផុត។ អ្នកប្រើប្រាស់ទាំងអស់អាចទទួលបានជំនួយបច្ចេកទេស និងការណែនាំផ្សេងៗយ៉ាងងាយស្រួល តាមរយៈវិធីសាស្ត្រពីរយ៉ាង៖

• តាមរយៈតំណភ្ជាប់ផ្ទាល់៖ ចូលទៅកាន់ https://t.me/ebc_support
• ការស្កែនកូដ៖ ស្កែន QR Code ដែលមានផ្ដល់ជូននៅក្នុងឯកសារណែនាំ ឬនៅលើគេហទំព័រផ្លូវការ

ផែនការបន្ទាប់

ប្រព័ន្ធបណ្ណាល័យអេឡិចត្រូនិច (eLibrary): គឺជាដំណោះស្រាយឌីជីថលដ៏ឆ្លាតវៃ ដែលត្រូវបានបង្កើតឡើងដើម្បីធ្វើទំនើបកម្មការគ្រប់គ្រងបណ្ណាល័យតាមស្ដង់ដារអន្តរជាតិ។ ប្រព័ន្ធនេះផ្តល់នូវមុខងារសំខាន់ៗដូចជា ការគ្រប់គ្រងបញ្ជីសៀវភៅតាមបែបឌីជីថល (Cataloging) ដែលអនុញ្ញាតឱ្យសិស្សានុសិស្ស និងគ្រូបង្រៀនអាចស្វែងរកធនធានចំណេះដឹង និងឯកសារយោងបានយ៉ាងរហ័សតាមរយៈមុខងារ OPAC (Online Public Access Catalog)។ លើសពីនេះប្រព័ន្ធថ្មីនេះក៏ជួយសម្រួលដល់កិច្ចការរដ្ឋបាលបណ្ណាល័យឱ្យមានប្រសិទ្ធភាពខ្ពស់ តាមរយៈប្រព័ន្ធស្វ័យប្រវត្តិនៃការខ្ចី-សងសៀវភៅ ការគ្រប់គ្រងទិន្នន័យសមាជិក និងការតាមដានស្ថិតិនៃការប្រើប្រាស់ធនធានអប់រំក្នុងពេលជាក់ស្តែង (Real-time)។ តាមរយៈការផ្សារភ្ជាប់គ្រឹះស្ថានសិក្សាទៅកាន់បណ្ដុំចំណេះដឹងដ៏សម្បូរបែបនេះ មិនត្រឹមតែជួយកាត់បន្ថយការប្រើប្រាស់ក្រដាស និងពេលវេលាប៉ុណ្ណោះទេ ប៉ុន្តែថែមទាំងជំរុញឱ្យការស្រាវជ្រាវបែបឌីជីថលមានភាពទូលំទូលាយ និងមាននិរន្តរភាពសម្រាប់សហគមន៍អប់រំទាំងមូល។

សេវាទូរទស្សន៍ EBC IPTV: ការដាក់ឱ្យដំណើរការ EBC IPTV គឺជាបដិវត្តន៍នៃវិស័យអប់រំឌីជីថល ដែលបើកឱកាសឱ្យសិស្សានុសិស្សអាចស្វ័យសិក្សាលើមេរៀនចំណេះដឹងទូទៅ និងជំនាញវិជ្ជាជីវៈបាន ២៤ ម៉ោងលើ ២៤ ម៉ោង។ តាមរយៈមុខងារវីដេអូតាមតម្រូវការ (VOD) អ្នកសិក្សាអាចជ្រើសរើសមេរៀនមកមើលឡើងវិញបានគ្រប់ពេលវេលា ដែលជាដំណោះស្រាយដ៏មានប្រសិទ្ធភាពក្នុងការលុបបំបាត់គម្លាតចំណេះដឹង និងផ្តល់ឱកាសសិក្សាប្រកបដោយសមធម៌សម្រាប់សិស្សានុសិស្សនៅតាមតំបន់ដាច់ស្រយាលទូទាំងប្រទេស។

ការពង្រីកវិសាលភាពនៃការផ្សព្វផ្សាយលើបណ្តាញសង្គម

ស្របតាមការវិវឌ្ឍនៃបច្ចេកវិទ្យា និងតម្រូវការទទួលបានព័ត៌មានយ៉ាងរហ័ស អង្គការ អ៊ីប៊ីស៊ី បានយកចិត្តទុកដាក់យ៉ាងខ្លាំងលើការប្រើប្រាស់បណ្តាញសង្គម ដើម្បីជាស្ពានចម្លងចំណេះដឹងទៅកាន់សាធារណជន។ ជាលទ្ធផល មកទល់នឹងពេលបច្ចុប្បន្ននេះ ទំព័រហ្វេសប៊ុក (Facebook) ផ្លូវការរបស់អង្គការ អ៊ីប៊ីស៊ី ទទួលបានការចាប់អារម្មណ៍ និងគាំទ្រយ៉ាងខ្លាំង។

“ការសិក្សាគឺសម្រាប់អ្នករាល់គ្នា គ្រប់ពេលវេលា និងគ្រប់ទីកន្លែង”