រាជធានីភ្នំពេញ៖ ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ បានដឹកនាំកម្មវិធីទស្សនកិច្ចសិក្សាស្តីពីការរៀបចំប្រព័ន្ធអេកូស៊ីសស្តែមអប់រំបែបឌីជីថលនៅស្ថាប័នផ្សព្វផ្សាយអប់រំកម្ពុជា (Educational Broadcasting Cambodia – EBC) ដោយមានការចូលរួមពីឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ អគ្គនាយក និងមន្ត្រីជំនាញ មកពីក្រសួងស្ថាប័នចំនួន ៣០។
កម្មវិធីទស្សនកិច្ចសិក្សានេះមានគោលបំណងបង្ហាញអំពីការផលិតមាតិកាឌីជីថល ការធ្វើឌីជីថលនីយកម្មមេរៀន ការរៀបចំថ្នាលអប់រំឌីជីថល ការតម្លើងហេដ្ឋារចនាសម្ព័ន្ធ ការបណ្តុះបណ្តាលនានា ដើម្បីជំរុញបរិវត្តកម្មឌីជីថលក្នុងវិស័យអប់រំ និងបណ្តុះបណ្តាលវិជ្ជាជីវៈ ព្រមទាំងចែករំលែកបទពិសោធន៍និងចំណេះដឹងលើការធ្វើបរិវត្តកម្មឌីជីថលក្នុងការអប់រំនិងបណ្តុះបណ្តាល។
ក្រោយពីការធ្វើបទបង្ហាញអំពីគំរោងនៃការរៀបចំស្ថាប័នផ្សព្វផ្សាយអប់រំកម្ពុជា ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ អគ្គនាយក និងមន្ត្រីជំនាញទាំងអស់បានទស្សនកិច្ចបន្ទប់ស្ទូឌីយោថតវីដេអូ បន្ទប់កាត់ត បន្ទប់បញ្ចូលសម្លេង បន្ទប់បណ្តុះបណ្តាល និងស្វែងយល់ពីការរៀបចំថ្នាលសិក្សាតាមបែបឌីជីថល សម្រាប់ជំរុញល្បឿននៃការធ្វើបរិវត្តកម្មឌីជីថលក្នុងវិស័យអប់រំ និងបណ្តុះបណ្តាលវិជ្ជាជីវៈរបស់ក្រសួងស្ថាប័នពាក់ព័ន្ធ តាមរយៈការប្រើប្រាស់បច្ចេកវិទ្យាឌីជីថល។
