រាជធានីភ្នំពេញ៖ នាព្រឹកថ្ងៃសុក្រ ទី០៩ ខែសីហា ឆ្នាំ២០២៤ ស្ថាប័នផ្សព្វផ្សាយអប់រំកម្ពុជា (EBC) និងក្រុមហ៊ុន មិត្តហ្វូន (Metfone) បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នាក្រោមអធិបតីភាពដ៏ខ្ពង់ខ្ពស់ ឯកឧត្តម សុខ ពុទ្ធិវុធ រដ្ឋលេខាធិការនៃក្រសួងប្រៃសណីយ៍និងទូរគមនាគមន៍ និងជាប្រធានគណៈកម្មការគ្រប់គ្រងគម្រោងស្ដីពីការបង្កើតនិងប្រតិបត្តិការថ្នាលអប់រំដោយប្រើប្រាស់បច្ចេកវិទ្យាគមនាគមន៍ព័ត៌មាននិងប្រព័ន្ធផ្សព្វផ្សាយ និង លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា និងអនុប្រធានគណៈកម្មការគ្រប់គ្រងគម្រោងស្ដីពីការបង្កើតនិងប្រតិបត្តិការថ្នាលអប់រំដោយប្រើប្រាស់បច្ចេកវិទ្យាគមនាគមន៍ព័ត៌មាននិងប្រព័ន្ធផ្សព្វផ្សាយ ព្រមទាំងថ្នាក់ដឹកនាំនិងមន្ត្រីដែលអញ្ជើញមកពី ក្រសួងអប់រំ យុវជន និងកីឡា ក្រសួងប្រៃសណីយ៍និងទូរគមនាគមន៍ ក្រុមហ៊ុន មិត្តហ្វូន ស្ថាប័នផ្សព្វផ្សាយអប់រំកម្ពុជា (EBC) សរុប ៣០រូប។
ពិធីចុះអនុស្សរណៈនាថ្ងៃនេះ គឺដើម្បីបើកទំព័រថ្មីនៃកិច្ចសហប្រតិបត្តិការរវាងស្ថាប័នទាំងពីរធ្វើឡើងដើម្បីរួមចំណែកក្នុងការចូលរួមអភិវឌ្ឍ និងលើកកម្ពស់វិស័យអប់រំនៅកម្ពុជា ដោយប្រើប្រាស់បច្ចេកវិទ្យាឌីជីថល ដែលត្រូវការយ៉ាងចាំបាច់នូវប្រព័ន្ធអ៊ីនធឺណិត ដែលនឹងអនុញ្ញាតឱ្យសិស្សានុសិស្ស លោកគ្រូ អ្នកគ្រូអាចអភិវឌ្ឍ និងសិក្សាបន្ថែមអំពីរបៀបបង្រៀន និងរៀនដោយប្រើប្រាស់បច្ចេកវិទ្យាឌីជីថល។
ភាគីទាំងពីរបានព្រមព្រៀងគ្នាលើគម្រោងផ្តល់ទិន្នន័យអ៊ីនធឺណិតរបស់ក្រុមហ៊ុនមិត្តហ្វូនសម្រាប់ការប្រើប្រាស់ថ្នាលបណ្តុះបណ្តាល និងមាតិកាឌីជីថលរបស់ EBC ដែលមានភាពបត់បែន និងផ្តល់ឱកាសឱ្យសិស្សានុសិស្ស គ្រូបង្រៀន មន្ត្រីរាជការ និងប្រជាពលរដ្ឋ អាចបង្កើនបទពិសោធនិងភាពពេញចិត្តក្នុងការសិក្សា ស្រាវជ្រាវ ក៏ដូចជាពង្រឹងគុណភាពវិស័យអប់រំផងដែរ។
ជាចុងបញ្ចប់ ស្ថាប័នផ្សព្វផ្សាយអប់រំកម្ពុជា (EBC) និង ក្រុមហ៊ុនមិត្តហ្វូន បានប្តេជ្ញាបន្តសហការឱ្យកាន់តែល្អប្រសើរឡើង ព្រមទាំងផ្តល់ការគាំទ្រនិងលើកទឹកចិត្តឱ្យក្រុមការងារបច្ចេកទេសនៃស្ថាប័នទាំងពីរបំពេញការងារក្នុងក្របខ័ណ្ឌនៃកិច្ចសហប្រតិបត្តិការដូចមានកំណត់ក្នុងអនុស្សរណៈនៃការយោគយល់គ្នាដែលត្រូវបានចុះហត្ថលេខានាថ្ងៃនេះ។
