ខេត្តកណ្តាល៖ នាព្រឹកថ្ងៃទី០៧ ខែឧសភា ឆ្នាំ២០២៤ ឯកឧត្តម សុខ ពុទ្ធិវុធ រដ្ឋលេខាធិការនៃក្រសួងប្រៃសណីយ៍និងទូរគមនាគមន៍ និងលោកជំទាវ គឹម សេដ្ឋានី រដ្ឋលេខាធិការប្រចាំការនៃក្រសួងអប់រំ យុវជន និងកីឡា បានអញ្ជើញទស្សនកិច្ចនៅវិទ្យាល័យ ហ៊ុន សែនសេរីភាព ដោយមានការចូលរួមពី ឯកឧត្តម លោក លោកស្រី ថ្នាក់ដឹកនាំ និងមន្រ្តីជំនាញ នៃក្រសួងប្រៃសណីយ៍និងទូរគមនាគមន៍ ប្រធានមន្ទីរអប់រំ យុវជន និងកីឡា ខេត្តកណ្ដាល ចៅសង្កាត់ក្រុងតាខ្មៅ ថ្នាក់ដឹកនាំស្ថាប័នផ្សព្វផ្សាយអប់រំកម្ពុជា(EBC) ថ្នាក់ដឹកនាំសាលាមានលោកនាយក លោកនាយករង និងលោកគ្រូ-អ្នកគ្រូ ប្រមាណជាង១០០នាក់។
កម្មវិធីសាកល្បងថ្នាក់ឌីជីថលនេះ ត្រូវបានដំណើរការក្រោមកិច្ចសហការរវាង វិទ្យាល័យ ហ៊ុន សែន សេរីភាព ជាមួយស្ថាប័នផ្សព្វផ្សាយអប់រំកម្ពុជា(EBC) ក្នុងគោលបំណងរួមចំណែកជំរុញការអប់រំប្រកបដោយគុណភាព សមធម៌ បរិយាប័ន្ន និងសិក្សាពេញមួយជីវិត។ ដើម្បីឆ្ពោះទៅយុគសម័យ ឌីជីថលគាំទ្រដល់ដំណើរការអប់រំតាមបែបស្វ័យសិក្សា សម្រាប់សិស្សានុសិស្សនៅគ្រប់ភូមិសិក្សា គ្រប់កម្រិតថ្នាក់ តាមពេលវេលា និងទីកន្លែងដែលសមស្រប។
កម្មវិធីនេះជាការបន្ថែមជម្រើសនៃការសិក្សា សម្រាប់សិស្សានុសិស្សនៅតាមគ្រឹះស្ថានសិក្សា ចំណេះទូទៅ និងជាពិសេសបង្កើតឧបករណ៍ស្វ័យសិក្សាតាមប្រព័ន្ធឌីជីថល ដែលមានលក្ខណៈសម្បូរបែប ទូលំទូលាយ ភាពបត់បែន និងផ្តល់ភាពងាយស្រួលសម្រាប់សិស្សានុសិស្សគ្រប់ៗរូប៕
