កម្មវិធីផ្លាស់ប្តូរការសិក្សារយៈពេល ៥ថ្ងៃនៅប្រទេសសិង្ហបុរីចាប់ផ្តើមទទួលពាក្យ
ភ្នំពេញ៖ កម្មវិធីផ្លាស់ប្តូរការសិក្សារយៈពេល ៥ថ្ងៃនៅប្រទេសសិង្ហបុរីបានចាប់ទទួលពាក្យសម្រាប់យុវជនដែលកំពុងសិក្សាថ្នាក់បរិញ្ញាបត្រចាប់ពីឆ្នាំទី ៣ឡើងទៅ។ ប្រធានបទនៃការផ្លាស់ប្តូរការសិក្សាឆ្នាំនេះគឺ AI and Graduate Research។ ចំពោះកម្មវិធីទាំងមូលនឹងមានបីដំណាក់កាលគឺ ការផ្លាស់ប្តូរការសិក្សារយៈពេល ៥ថ្ងៃនៅសិង្ហបុរី ការបណ្តុះបណ្តាល និងការធ្វើបទបង្ហាញតាមអ៊ីនធឺណេត។យោងតាមគេហទំព័រនៃសាកលវិទ្យាល័យNUS ការផ្លាស់ប្តូរការសិក្សានេះនឹងផ្តល់ជូនកន្លែងស្នាក់នៅ នៅក្នុងបរិវេណសាកលវិទ្យាល័យ និងប្រាក់ឧបត្ថម្ភ ៥០០ដុល្លារសិង្ហបុរីបើសិនបេក្ខជនបានចូលរួមគ្រប់វគ្គសិក្សាតាមរយៈប្រព័ន្ធអនឡាញទាំងអស់។នៅក្នុងកម្មវិធីនេះ បេក្ខជននឹងបានធ្វើដំណើរទស្សនកិច្ចនៅតាមមន្ទីរពិសោធន៍ និងស្រាវជ្រាវ និងកន្លែងទេសចរណ៍ក្នុងស្រុកល្បីៗ។ បេក្ខជននឹងទទួលបានឱកាសចូលរួមសិក្ខាសាលា និងសិក្សាជាមួយសាស្ត្រាចារ្យ និងអ្នកស្រាវជ្រាវនៅសាកលវិទ្យាល័យNUS។ លើសពីនេះ បេក្ខជនក៏ទទួលបានវគ្គបណ្តុះបណ្តាល និងការបង្រៀនតាមរយៈប្រព័ន្ធអនឡាញរយៈពេល ៣សប្តាហ៍ និងធ្វើបទបង្ហាញពីគម្រោងផងដែរ។
- Criteria and Eligibility
- Required Document
- Benefit
បើតាមប្រភពដដែល ឱកាសនេះផ្តល់ឱ្យនិស្សិតដែលកំពុងសិក្សាថ្នាក់បរិញ្ញាបត្រចាប់ពីឆ្នាំទី៣ឡើងទៅដែលមានលទ្ធផលនៃការសិក្សាល្អ មានបទពិសោធន៍ ព្រមទាំងមានចំណេះដឹងទូលំទូលាយ។ ក្នុងនោះ ដើម្បីដាក់ពាក្យបេក្ខជនត្រូវមានឯកសារមួយចំនួនដូចជា ប្រវត្តិរូបសង្ខេបទម្រង់A4 សេចក្តីថ្លែងការផ្ទាល់ខ្លួន ឬអត្ថបទឆ្លុះបញ្ចាំងដែលលើកឡើងចំណាប់អារម្មណ៍ផ្ទាល់ខ្លួន និងការរំពឹងទុក និងបញ្ហាសង្គមណាមួយដែលកំពុងជួប្រទះ និងដំណោះស្រាយ។ បេក្ខជនក៏ត្រូវមានព្រឹត្តិបត្តិពិន្ទុ លិខិតណែនាំចំនួន២ច្បាប់ដែល(លើកទឹកចិត្តឱ្យណែនាំពីមហាវិទ្យាល័យដែលកំពុងសិក្សាដែលរៀបរាប់ពីការសិក្សា និងការស្រាវជ្រាវ។ ជាចុងក្រោយគឺរូបថត និងលិខិតឆ្លងដែន។
គួរបញ្ជាក់ផងដែរថា ចំពោះអាហារពេលថ្ងៃនិងល្ងាច និងថ្លៃចំណាយនានាជាបន្ទុករបស់បេក្ខជន។ ចំពោះថ្លៃយន្តហោះថ្វីត្បិតែមិនមានការផ្តល់ឱ្យ ប៉ុន្តែបេក្ខជនអាចយកថវិកាដែលទទួលបាន៥០០ដុល្លារសិង្ហបុរីទៅរ៉ាប់រងលើវាបាន។ បើសិនជាបេក្ខជនមានចំណាប់អារម្មណ៍សូមចូលទៅកាន់ តំណរភ្ជាប់ និងដាក់ពាក្យឱ្យបានត្រឹមថ្ងៃទី១៥ ខែមីនា ឆ្នាំ២០២៦៕ 
