ពិព័រណ៍ជាតិការងារ និងផលិតភាពជាតិឆ្នាំ២០២៦

អំពីកម្មវិធី

– ការរៀបចំ ៖ ទីភ្នាក់ងារជាតិមុខរបរ និងការងារ (NEA) នឹងរៀបចំកម្មវិធីពិព័រណ៍ជាតិការងារ និងផលិតភាពការងារ ឆ្នាំ២០២៦ ក្រោមប្រធានបទ «ជំនាញ និងការងារ៖ ផលិតភាពការងារដើម្បីកំណើនសេដ្ឋកិច្ចប្រកបដោយចីរភាព» នឹងប្រារព្ធឡើងរយៈពេល 0២ ថ្ងៃ ចាប់ពីថ្ងៃសៅរ៍ ១កើត ដល់ថ្ងៃអាទិត្យ ២កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១២-១៣ ខែកញ្ញា ឆ្នាំ២០២៦ នៅមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

– កិច្ចសហការ និងការគាំទ្រ៖ ក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា និងក្រោមការគាំទ្រដោយកម្មវិធីមុខរបរ និងការងារសមរម្យសម្រាប់យុវជននៅកម្ពុជា (ដំណាក់កាលទី៣) មូលនិធិអភិវឌ្ឍន៍ជំនាញ និងធនាគារពិភពលោក រួមទាំងសហព័ន្ធសេវាអប់រំកម្ពុជា កិច្ចសហការជាមួយសមាគមសហគ្រិនវ័យក្មេងកម្ពុជា និងវេសឡាញ អេឌ្យូខេសិនគ្រុប លើផ្នែកការប្រកួតប្រជែងនិយាយជាសាធារណៈ។​​

– ការចូលរួម៖ មានការចូលរួមពីសំណាក់ក្រសួង-ស្ថាប័ន ក្រុមហ៊ុន-សហគ្រាស គ្រឹះស្ថានអប់រំបណ្តុះបណ្តាល អង្គការជាតិ-អន្ដរជាតិប្រមាណ ១៥០ ធ្វើការផ្សព្វផ្សាយ និងដាក់តាំងបង្ហាញ និងមានតម្រូវការជ្រើសរើសកម្លាំងពលកម្មដែលរំពឹងទុកថាប្រមាណ ៣៥ ០០០ កន្លែង។

– សួនការងារ (Career Park)៖ រៀបចំជាយន្តការបន្ថែមនៃកម្មវិធីពិព័រណ៍ដែលមានភាពងាយស្រួលនៅមួយកន្លែង (One Stop Service) សម្រាប់អ្នកស្វែងរកការងារធ្វើ សិស្ស និស្សិតអាចដាក់ពាក្យភ្លាម សម្ភាសភ្លាមនៅទីតាំងសួនការងារ ដែលមានការរៀបចំ និងព្រីនប្រវត្តិរូបសង្ខេប (CV) សម្រាប់ដាក់ពាក្យស្វែងរកការងារភ្លាមៗ បន្ទាប់មកអាចជួបជាមួយអ្នកជំនាញប្រឹក្សាយោបល់ដើម្បីត្រៀមខ្លួនទុកជាមុនក្នុងការចូលសម្ភាសជាមួយក្រុមហ៊ុន និងអាចបន្តទៅជួបជាមួយពិភពព័ត៌មានការងារផ្សេងៗជាច្រើននៅក្នុងបរិវេណសួនការងារ។

– ការប្រកួតប្រជែងនិយាយជាសាធារណៈ៖ ចូលរួមពង្រឹងសមត្ថភាពយុវជនតាមរយៈការរួមបញ្ចូលនូវកិច្ចការប្រកួតប្រជែងនិយាយជាសាធារណៈ ដែលត្រូវបានរៀបចំឡើងដើម្បីឆ្លុះបញ្ចាំងពីប្រធានបទស្នូលក្នុងគោលបំណងបំផុសគំនិតទាក់ទងនឹងបច្ចេកវិទ្យាឌីជីថល និងការផ្លាស់ប្តូររចនាសម្ព័ន្ធសេដ្ឋកិច្ចពិភពលោកដើម្បីការអភិវឌ្ឍសេដ្ឋកិច្ច និងសង្គមឌីជីថលរបស់កម្ពុជា សំដៅដល់ការធ្វើបរិវត្តកម្មឌីជីថល (Digital Transformation) និងការកាត់បន្ថយគម្លាតជំនាញដោយការកែទម្រង់កម្មវិធីសិក្សា ដើម្បីបង្កើនផលិតភាពការងារ។ កម្មវិធីនេះមានការចូលរួមពីវិស័យឯកជន និងការពង្រឹងកិច្ចសហការរវាងគ្រឹះស្ថានសិក្សានិងវិស័យឧស្សាហកម្ម តាមរយៈការមកចែករំលែកចំណេះដឹង បទពិសោធល្អៗ និងគន្លឹះសំខាន់ៗពីសំណាក់វាគ្មិនជំនាញៗ ដែលមានបទពិសោធយូរឆ្នាំនៅក្នុងវិស័យការងារ ដែលស្ថិតនៅក្នុងអន្តរកាលឌីជីថលលូបនីយកម្មនេះ។